Низом

“PROlogue” халқаро кинофестивали регламенти

I. Умумий қоидалар

1. Мазкур Низом “PROlogue” халқаро кинофестивалини (қуйида матн бўйича – “Фестиваль”) ташкиллаштириш ва ўтказиш, шунингдек иштирокчилар фильмларини саралаш ва танлаш тартибини белгилайди.

2. Фестиваль 2019 йил 27 ноябрдан 30 ноябргача Тошкент шаҳрида ўтказилади.

3. Фестиваль доирасида, танлов дастуридан ташқари, махсус кино намойишлари, мастер-класслар, давра суҳбатлари ва конференциялар тақдим қилинган.

II. Фестиваль ташкилотчилари

4. Фестиваль ташкилотчилари қуйидагилардан иборат:

- Ўзбекистон Ёшлар иттифоқи;

- “Ўзбеккино” Миллий агентлиги;

- Тошкент шаҳар ҳокимияти;

- «Кинематографияни ривожлантириш маркази»;

- «Ёш кинематографистлар кенгаши»;

- «Ўзбекистон Миллий кинокомиссияси».

5. Фестиваль дирекцияси (қуйида матн бўйича – “Дирекция”) Фестиваль ишчи органи ҳисобланади.

6. Фестивал ўтказиладиган жой:

- Ёшлар ижодкорлик саройи;

- Алишер Навоий номидаги Ўзбекистон Давлат академик катта театри;

- «Premier Hall» кинотеатри.

7. Дирекциянинг доимий фаолият юритиш жойи: Тошкент шаҳар, Муқимий кўчаси, 8.

8. Фестивалнинг расмий сайти: www.prologuefilmfestival.com.

III. Кинофестивалнинг мақсадлари ва вазифалари

9. Фестиваль мақсади – Ўзбекистон миллий кинематография обрў-эътиборини мустаҳкамлаш, ўзбек фильмларини жаҳон кино оламига олиб чиқиш, миллий маданият ва умуминсоний қадриятларни сақлаш, шунингдек чет эллик кино арбоблари билан маданий тажриба алмашиш ва халқаро ҳамкорликни ривожлантириш воситаси сифатида кино санъатига кенг жамоатчилик қизиқишини ошириш.

10. Кинофестивалнинг вазифалари:

- миллий кинематографияни ривожлантиришга, уни бутун дунёда оммалаштиришга кўмаклашиш, шунингдек ўзбек киносининг ҳам замонавий, ҳам олтин фондини намойиш этиш ва тарғиб қилиш;

- муаллифлик киносига, ижтимоий фаоллик ва маънавий етукликни оширишга ёрдам берадиган фильмларга томошабинлар турғун қизиқишларини таъминлаш. Мамлакатимиз томошабинларини замонавий жаҳон кинематографиясининг энг яхши асарлари билан таништириш;

- кино тилини ривожлантирувчи ва жаҳон кино жараёни йўналишларини акс эттирувчи ёрқин, ўзига хос кино санъати асарларини жалб қилиш;

- кино соҳасида халқаро алоқаларни мустаҳкамлаш ва ривожлантириш;

- жаҳон кино саноатининг етакчи вакилларини биргаликдаги ҳамкорликка жалб қилиш учун Ўзбекистоннинг ноёб тарихий-маданий меросини оммалаштириш;

- Ўзбекистоннинг ёш қобилиятли кинематографистларини аниқлаш ва уларнинг ижодини профессионал қўллаб-қувватлаш, бошқа мамлакатлардаги ўз ҳамкасблари билан алоқалар ўрнатиш учун шарт-шароитлар яратиш.

IV. Фестиваль дастури

11. Танлов дастури:

- Халқаро тўла метражли бадиий фильмлар танлови;

- Халқаро қисқа метражли бадиий фильмлар танлови; 

- Миллий қисқа метражли бадиий фильмлар танлови.

12. Совринлар:

– Энг яхши фильм учун Гран При;

– Энг яхши режиссёр;

– Энг яхши оператор;

– Энг яхши сценарий;

– Энг яхши актриса;

– Энг яхши актёр;

– Энг яхши қисқа метражли фильм;

– Энг яхши миллий қисқа метражли фильм.

13. Ташкилий қўмита ва Дирекция томонидан қуйидаги совринлар топширилади:

- “Ўзбек кинематографиясига қўшган ҳиссаси учун”;

- “Жаҳон кинематографиясига қўшган ҳиссаси учун”.

V. Фильмларга қўйиладиган талаблар

14. Халқаро тўла метражли бадиий фильмлар танлови:

- тўла метражли бадиий фильмлар асосий дастурига энг камида 6 (олтита) фильм танлаб олинади;

- саралаш учун суратга олиш якунланган санаси 2018 йил 01 январдан олдин бўлмаган, 60 дақиқадан кам бўлмаган давомийликка эга фильмлар қабул қилинади;

- фильмлар ёшлар билан боғлиқ ва/ёки ёшлар учун долзарб мавзуларга эга бўлиши керак.

15. Халқаро қисқа метражли бадиий фильмлар танлови:

- қисқа метражли бадиий фильмлар танлов дастурига энг камида 12 (ўн иккита) фильм танлаб олинади;

- саралаш учун суратга олиш якунланган санаси 2018 йил 01 январдан олдин бўлмаган, 30 дақиқадан кўп бўлмаган давомийликка эга фильмлар қабул қилинади;

- режиссёр ёши 35 ёшдан ошмаган бўлиши керак.

16. Тўла метражли бадиий фильмлар ва қисқа метражли фильмлар Марказий Осиёда фильм премьераси бўлиши керак. Фильм яратилган мамлакатда премьераси намойиш қилиниши мумкин бўлган Марказий Осиё региони фильмлари бундан мустасно.

17. Миллий қисқа метражли бадиий фильмлар танлови:

- миллий қисқа метражли бадиий фильмлар танлов дастурига энг камида 12 (ўн иккита) фильм танлаб олинади;

- саралаш учун суратга олиш якунланган санаси 2018 йил 01 январдан олдин бўлмаган, 30 дақиқадан кўп бўлмаган давомийликка эга фильмлар қабул қилинади;

- фильм асл нусхада тақдим қилиниши керак;

- режиссёр ёши 35 ёшдан ошмаган бўлиши керак.

VII. Параллел дастурлар

18. Фестиваль доирасида мастер-класслар, давра суҳбатлари, конференциялар, питчинглар ва халқаро кино саноатининг етакчи вакиллари иштирокида бошқа тадбирлар ўтказилади.

VIII. Фильмларни танлаш ва танлов намойиши учун талаблар

19. Фильм Фестивалнинг танлов дастурида иштирок қилиши учун кинофестиваль сайтида аризани тўлдириш керак, фильмга ҳавола инглиз тилидаги субтитрлар билан vimeo.com ёки YouTube сервислари орқали тақдим қилинади.

Дедлайн ариза бериш: 1 сентябрь 2019 йил.

20. Фестиваль фильм тақдим қилиниши учун ҳақ олмайди.

21. Зўравонлик, наркомания, порнография, диний экстремизм ва фундаментализмни тарғиб қиладиган, давлат сиёсатини қоралайдиган ва халқ норозилигини қўзғатишга қаратилган фильмлар Фестивалда иштирок қилишга рухсат берилмайди, шунингдек тақдим қилинадиган фильмлар миллий анъаналаримизга ва умуминсоний қадриятларга зид бўлмаслиги керак.

22. Дастурга танлаб олинган фильмлар расмий вакиллари Фестивалда иштирок қилиш тўғрисида 2019 йил 01 ноябргача электрон почта орқали хабардор қилинади.

23. Фестиваль танловларида иштирок қилаётган фильмлар нусхалари DCP ва Blu-ray форматларида Фестиваль Дирекциясига 2019 йил 15 ноябрдан кечиктирилмаган ҳолда топширилиши керак.

24. Танлаб олинган ва тасдиқланган фильмлар дастур расмий эълон қилингандан ва фильмнинг расмий вакили томонидан тасдиқнома олингандан сўнг Фестиваль дастуридан олиб ташланиши мумкин эмас.

25. Фильмни танлов дастурида иштирок қилишга таклиф этиш тўғрисидаги ахборот Дирекция томонидан расмий эълон қилингунга қадар Фестиваль ва иштирокчи ўртасида махфий бўлиб қолади. 

26. Иштирок қилишни тасдиқлаш тўғрисида расмий эълон қилингандан сўнг фильмнинг расмий вакили Дирекцияга қуйидаги материалларни юбориши керак:

- маркетинг материаллари, синопсис, press kit;

- FULL HD сифатли трейлер ёки тизер;

- чет элда яратилган фильмлар учун – таймкодли субтитрлар файли ва/ёки оригинал тилда, рус ёки инглиз тилида диалог варақлари, фильмнинг финал версияси скринери;

- каталог учун материаллар (фильм яратувчилари тўғрисида маълумотлар, фотосуратлари, шу жумладан режиссёр фотосуратлари, фильмдан кадрлар). Фильмдан бир-икки дақиқали парча, булардан промоушен ва мукофотлаш маросими учун фойдаланилади.

27. Фестиваль Дирекцияси барча тақдим қилинган материаллардан нашр ва бошқа материаллар, шу жумладан фестиваль каталоги, пресс-релизлар, фестиваль сайти, ижтимоий тармоқлар ва ОАВда промоушен учун фойдаланиш ҳуқуқини сақлаб қолади.

28. Материаллар Фестиваль электрон почтасига кўчириб олиш учун ҳавола фильмнинг инглиз тилида ёки оригинал тилида номланиши билан хат мавзуида юборилиши керак. Материаллар Фестиваль томонидан фильмнинг дастурда иштирок қилиши тасдиқланган пайтдан эътиборан 7 (етти) кундан кечиктирилмай олиниши керак.

29. Барча шартлар ва муддатлар ижро учун мажбурий ҳисобланади, акс ҳолда Фестиваль Дирекцияси фильмни кинофестиваль дастуридан олиб ташлаш ҳуқуқини сақлаб қолади.

IX. Фильмлар нусхаларини транспортировка қилиш ва суғурталаш

30. Намойиш қилиш учун фильмлар нусхаларини транспортировка қилиш бўйича харажатлар Фестиваль Дирекцияси томонидан қопланади.

31. Жўнатувчи томон Фестивални фильм нусхалари юборилганлиги тўғрисида ўз вақтида хабардор қилиши ва авиа-юкхатини тақдим қилиши шарт.

32. Фильмлар нусхаларини сақлаш ва суғурталаш бўйича харажатлар Фестиваль Дирекцияси томонидан тўланади.

X. Фестиваль ҳакамлар ҳайъати

33. Танлов фильмларини баҳолаш учун ҳар бири энг камида 5 (беш) кишидан иборат Халқаро тўла метражли фильмлар танлови ҳакамлар ҳайъати ва Халқаро қисқа метражли фильмлар танлови ҳакамлар ҳайъати ташкил этилади.

34. Дирекция Халқаро ҳакамлар ҳайъати ҳар бир аъзосининг мамлакатимизда бўлиши ҳамда Фестивалга ва қайта қатнови учун йўл ҳақи бўйича харажатларни ўз зиммасига олади.

35. Ҳар бир ҳакамлар ҳайъати таркибига тегишли танловда намойиш қилинадиган фильмлар яратилишида ва уларнинг тижорат прокатида иштирок қиладиган шахслар киритилиши мумкин эмас.

XI. Фестиваль меҳмонлари ва иштирокчилари

36. Меҳмонларни таклиф этиш, уларнинг мамлакатимизда бўлиши муддатлари ва шарт-шароитлари ҳамда фестивалга аккредитация қилиниши тўғрисидаги масалалар Дирекция томонидан ҳал қилинади.  

37. Фильмларнинг Фестиваль танлов дастурларида иштироки фильмнинг 1 (бир) нафар вакили муқаррар иштирокини назарда тутади. Фильм режиссёри, продюсери ёки бош роль ижрочисига устунлик берилади.

38. Дирекция Фестиваль ўтказиладиган бутун давр мобайнида ҳар икки томонга йўл ҳақи ва истиқомат қилиш тўлови бўйича харажатларни ўз зиммасига олади.

39. Фестивалнинг бошқа меҳмонлари истиқомат қилиш шарт-шароитлари шахсий таклифномаларда белгилаб қўйилади.

XII. Якуний қоидалар

40. Фестивалда иштирок қилиш мазкур Регламентнинг барча бандларига риоя этилишини назарда тутади. Регламент бўйича низоли масалалар пайдо бўлган ҳолатда, мазкур Регламентнинг рус тилидаги матни асос сифатида олинади.